کراچی (ڈیسک) متحدہ قومی موومنٹ پاکستان کے سربراہ خالد مقبول صدیقی نے کہا ہے کہ ہمارے بغیر صرف حکومت ہی نہیں بلکہ اپوزیشن بھی کمزور ہے۔
کراچی پریس کلب میں میٹ دی پریس سے خطاب کرتے ہوئے خالد مقبول صدیقی کا کہنا تھا کہ ایم کیو ایم کی اہمیت کا اندازہ ایوان کے نشستوں سے نہیں لگایا جاسکتا ہے، ہمارے بغیر صرف حکومت ہی نہیں بلکہ اپوزیشن بھی کمزور ہے، جانتے ہیں حکومت اور اپوزيشن ہمارے بغیر کامیاب نہیں ہوسکتے۔
انھوں نے کہا کہ شہر کراچی کی مردم شماری پر کوئی سمجھوتا نہیں ہوگا، زرداری سمیت جسٹس (ر) گلزار بھی کہہ چکے کہ کراچی کی آبادی 3 کروڑ سے زائد ہے لیکن اب مردم شماری ختم ہونے کو ہے اور کراچی کی آبادی 84 لاکھ تک بتائی جارہی ہے۔
ان کا کہنا تھا کہ سوال تو یہ ہے کہ جس شہر سے لوگ آرہے ہیں وہاں کی آبادی بڑھ رہی ہے لیکن جہاں رہائش اختیار کررہے ہیں وہاں آبادی کی شرح کم دکھائی جارہی ہے۔
خالد مقبول صدیقی نے کہا کہ ایم کیو ایم جمہوریت پر پختہ یقین رکھنے والی جماعت ہے لیکن مکالمے کے سب سے زیادہ مخالف عمران خان ہی رہے ہیں۔
انہوں نے کہا کہ ہم غداری کے سرٹیفکیٹ کو تمغے سمجھتے ہیں، جب پیپلز پارٹی پر مشکل آتی ہے تو وہ سندھ کارڈ کھیلتی ہے۔