لاہور (نیوز ڈیسک) ایشین ہاکی چیمپئنز ٹرافی سے قبل پاکستان ہاکی ٹیم سینئر کھلاڑیوں کے بعد غیر ملکی کوچ رولینٹ آلٹمنز کی خدمات سے بھی محروم ہوگئی۔
ایشین ہاکی چیمپئنز ٹرافی 8 ستمبر سے شروع ہوگی اور پاکستان اپنا پہلا میچ ملائیشیا کے خلاف کھیلے گا۔
تاہم معلوم ہوا ہے کہ چین میں موجود پاکستان ہاکی ٹیم غیر ملکی ڈچ کوچ رولینٹ آلٹمنز کی جانب سے کوچنگ سے انکار کے باعث مشکلات کا شکار ہے۔
ذرائع کے مطابق رولینٹ پاکستانی ٹیم کے ساتھ طویل معاہدے کے خواہشمند ہیں جبکہ پاکستا ن ہاکی فیڈریشن ان سے ایونٹ ٹو ایونٹ کنٹریکٹ کرنا چاہتی تھی۔
ذرائع کے مطابق رولینٹ آلٹمنز ایشین ہاکی چیمپئنز ٹرافی میں پاکستان ٹیم کو دستیاب نہیں ہوں گے۔
دریں اثناء پاکستان ہاکی ٹیم کے نائب کپتان ابوبکر کا بھی تاحال چین کا ویزا نہیں لگا ہے اور وہ آسٹریلیا میں لیگ ہاکی کھیل رہے ہیں۔
مرتضٰی یعقوب، احتشام اسلام اور عبدالرحمٰن یورپ میں لیگ کھیل رہے ہیں جبکہ ارباز احمد نے مصروفیت کے باعث چین جانے سے انکار کردیا تھا۔
اذلان شاہ اور نیشنز کپ کھیلنے والی پاکستان ہاکی ٹیم کے 6 سینئر کھلاڑی ٹیم کو دستیاب نہیں ہیں۔