اسلام آباد (ڈیسک) پوزیشن نے ڈپٹی اسپیکر قاسم سوری کے خلاف تحریک عدم عتماد واپسی لینے کا اعلان کردیا.
اسپیکر قومی اسمبلی اسدقیصرکی زیر صدارت اسپیکر چیمبر میں حکومت اور اپوزیشن کا مشاورتی اجلاس ہوا جس میں حکومت کی طرف سے اعظم سواتی، اسد عمر، پرویز خٹک اور علی محمد خان جبکہ اپوزیشن کی جانب سے خواجہ آصف، راجا پرویز اشرف، شازیہ مری، محسن داوڑ شریک ہوئے۔
اجلاس میں ڈپٹی اسپیکر کے خلاف عدم اعتماد کی تحریک کا معاملہ زیر غور آیا اور حکومت کی جانب سے اپوزیشن کو اعتماد میں لیے اور مشاورت کیے بغیر 8 آرڈیننس اسمبلی میں پیش کیے جانے کے مسئلے پر بات چیت ہوئی۔ حکومت اور اپوزیشن کے درمیان معاملے پر اتفاق رائے ہوگیا۔
کچھ دیر بعد اسپیکر اسدقیصرکی زیر صدارت قومی اسمبلی کا اجلاس ہوا جس میں ن لیگ کے رہنما خواجہ آصف نے ڈپٹی اسپیکرقاسم سوری کے خلاف تحریک عدم اعتماد واپس لینے کا اعلان کردیا۔ اس موقع پر اسدعمر نے کہا کہ ڈپٹی اسپیکر کا معاملہ افہام و تفہیم سے حل کرلیا ہے۔
اپوزیشن جماعتوں نے ڈپٹی اسپیکر کیخلاف تحریک عدم اعتماد جمع کرائی تھی۔
اس سے قبل آج صبح قومی اسمبلی سیکرٹریٹ نے ڈپٹی اسپیکرقاسم سوری کے خلاف اپوزیشن کی تحریک عدم اعتماد پر اعتراض عائد کرتے ہوئے واپس کردی تھی اور قاسم سوری کے خلاف اپوزیشن سے وضاحت بھی مانگی تھی۔
قومی اسمبلی سیکرٹیریٹ نے تحریک عدم اعتماد واپس کرتے ہوئے اعتراض کیا تھا کہ اپوزیشن نے تحریک عدم اعتماد میں کہا ہے کہ ڈپٹی اسپیکرنے رولز کی خلاف ورزی کی، وضاحت کی جائے کہ ڈپٹی اسپیکرنے کون سے رولز کی خلاف ورزی کی ہے۔
