پشاور (ڈیسک) انتخابات کی تاریخ نہ دینے کے معاملے پر گورنر خیبر پختونخوا غلام علی کے خلاف توہین عدالت کی درخواست دائر کردی گئی۔
پی ٹی آئی کے رہنما مشتاق غنی کی جانب سے گورنر خیبرپختونخوا کے خلاف دائر کی گئی توہین عدالت کی درخواست میں الیکشن کمیشن کو بھی فریق بنایا گیا ہے۔
میڈیا سے گفتگو کرتے ہوئے مشتاق غنی کا کہنا تھا کہ گورنر کا کیا کام ہے کہ وہ سکیورٹی کے حوالے دیں؟ چیف ایگزیکٹو کا اختیار ہے کہ وہ امن و امان کی صورت حال دیکھے، گورنر عدالت کا حکم نہیں مان رہے، 90 دن کا مطلب 90 دن ہے، ایک گھنٹہ بھی اوپر نہیں ہو سکتا۔
تحریک انصاف کے رہنما نے کہا کہ یہ 100 ارب کا آٹا فری دینا چاہ رہے ہیں لیکن انتخابات کرانے کے لیے ان کے پاس پیسے نہیں ہیں۔