You are currently viewing امن خراب کرنے والوں کے لیے کوئی جگہ نہیں ہوگی، آرمی چیف جنرل عاصم منیر

امن خراب کرنے والوں کے لیے کوئی جگہ نہیں ہوگی، آرمی چیف جنرل عاصم منیر

راولپنڈی (ڈیسک) آرمی چیف جنرل عاصم منیر نے ضلع خیبر میں وادی تیراہ کا دورہ کیا۔ انٹرسروسز پبلک ریلیشنز کے مطابق آرمی چیف نے پاک افغان سرحد پر تعینات فوجی جوانوں کے ساتھ دن گزارا۔ آئی ایس پی آر کا کہنا ہے کہ آرمی چیف نے فوجی جوانوں کی آپریشنل تیاریوں اور بلند حوصلے کو سراہا۔ آئی ایس پی آر کے مطابق آرمی چیف نے جوانوں اور افسران سے خطاب میں کہا کہ قبائلی عوام اور سکیورٹی فورسز کی بے شمار قربانیوں کے باعث ریاست کی عمل داری قائم ہوئی ہے۔ آرمی چیف نے کہا کہ قوم کے تعاون سے دیرپا امن و استحکام کے حصول تک دہشتگردی کیخلاف جنگ جاری رہے گی، مادر وطن کے دفاع کو ہر قیمت پر یقینی بنایا جائے گا، کسی کو دہشتگردی کیخلاف جنگ میں کامیابیوں کو سبوتاژ کرنے کی اجازت نہیں دی جائے گی، امن کو خراب کرنے والوں کے لیے کوئی جگہ نہیں ہوگی۔علاوہ ازیں آرمی چیف جنرل عاصم منیر نے کور ہیڈ کوارٹرز پشاور کا بھی دورہ کیا جہاں انہیں آپریشنل، ٹریننگ اور فارمیشن کے دیگر امور پر بریفنگ دی گئی۔ آئی ایس پی آر کے مطابق آرمی چیف کو ضم شدہ اضلاع کی سماجی و اقتصادی ترقی کے منصوبوں کے لیے محفوظ ماحول کی کوششوں پر بھی بریفنگ دی گئی۔ آرمی چیف کی آمد پر کور کمانڈر پشاور لیفٹیننٹ جنرل حسن اظہرحیات نے ان کا استقبال کیا۔