You are currently viewing اسٹیٹ بینک سینیٹ کی گولڈن جوبلی کے موقع پر 50 روپے کا یادگاری سکہ جاری کرے گا

اسٹیٹ بینک سینیٹ کی گولڈن جوبلی کے موقع پر 50 روپے کا یادگاری سکہ جاری کرے گا

اسلام آباد (ڈیسک) اسٹیٹ بینک پارلیمنٹ کے ایوان بالا کی گولڈن جوبلی کے موقع پر 50 روپے کا یادگاری سکہ جاری کرے گا۔
اسٹیٹ بینک کی جانب سے جاری اعلامیہ کے مطابق سینیٹ آف پاکستان کی تشکیل کی 50 سال مکمل ہونے پر 50 روپے کا یادگاری سکہ جاری کیا جائے گا ۔
اعلامیہ میں کہا گیا ہے کہ سینیٹ آف پاکستان میں پاکستان کے تمام صوبوں کو مساویانہ نمائندگی دی گئی ہے، یہ ایک مستقل ایوان ہے جو قومی امور کے پروسیس میں تسلسل کی علامت ہے۔
2023ء پاکستان کے سینیٹ کی گولڈن جوبلی کا سال ہے۔ اس خصوصی موقع کی مناسبت سے وفاقی حکومت نے اسٹیٹ بینک کو 50 روپے کا یادگاری سکہ جاری کرنے کی اجازت دی ہے۔
یہ یادگاری سکہ 17 مارچ 2023ء سے ایس بی پی بینکنگ سروسز کارپوریشن کے فیلڈ دفاتر کے تمام تبادلہ کاؤنٹرز سے جاری کیا جائے گا۔
50 روپے کے یادگاری سکے کی شکل گول ہے جسے 30.0 ملی میٹر سمت کے ساتھ نقش کیا گیا ہے، اس کا وزن 13.5 گرام اور یہ تانبے اور نکل کے دھاتی اجزا ( تانبا 75 فیصد اور نکل 25 فیصد) پرمشتمل ہے۔
سکے کے سامنے کے رخ کے درمیان میں بڑھتا ہوا ہلالی چاند اور پانچ نوکوں پر مشتمل ستارہ دیا گیا ہے جس کا رخ شمال مغرب کی طرف ہے۔ سکے کے دائرے کے ساتھ چاند ستارے کے اوپر ” اسلامی جمہوریہ پاکستان “ کے الفاظ اردو اسکرپٹ میں کندہ کیے گئے ہیں۔
چاند کے نیچے اور گندم کی اوپر کو اٹھتی ہوئی دو شاخوں کے اوپر سکے کے اجرا کا سال تحریر ہے۔ سکے کی ظاہری مالیت”50“ ابھرے ہوئے اعداد میں اور ”روپیہ“ اردو اسکرپٹ میں بالترتیب چاند ستارے کے دائیں اور بائیں جانب تحریر کیے گئے ہیں۔
سکے کی پچھلی طرف اور سکے کے مرکز میں سینیٹ آف پاکستان کے امتیازی نشان کو 50 کے فنکارانہ عددی الفاظ کے ساتھ دیا گیا ہے جو اس کے دائیں جانب ہے۔ اس امتیازی نشان کے اوپر دائرے کے ساتھ اردو اسکرپٹ میں ”پاکستان سینیٹ گولڈن جوبلی“ کے الفاظ کندہ ہیں۔ سینیٹ کے امتیازی نشان کے نیچے گولڈن جوبلی کی مدت (1973-2023) درج ہے۔

Nimra Jamali

Nimra Jamali is an emerging content writer, who is writing for News Pakistan TV for quite some time now.