You are currently viewing اسٹیبلشمنٹ سے مفاہمت کا فیصلہ بانی پی ٹی آئی کریں گے، علی امین

اسٹیبلشمنٹ سے مفاہمت کا فیصلہ بانی پی ٹی آئی کریں گے، علی امین

راولپنڈی (نیوز ڈیسک) وزیراعلیٰ خیبر پختونخوا علی امین گنڈا پور نے کہا ہے کہ بطور وفاقی حکومت اور صوبائی حکومت ہم آپس میں رابطے رکھیں گے لیکن ووٹ چوروں کے ساتھ مفاہمت نہیں کریں گے۔
اڈیالہ جیل کے باہر میڈیا سے گفتگو میں علی امین گنڈا پور نے کہا کہ بانی پی ٹی آئی کہہ رہے ہیں رول آف لاء ہونا چاہیے، ہم نظریے کے مطابق کام جاری رکھیں گے، ہم ایسا نظام بنائیں گے آئندہ کوئی مینڈیٹ چوری نہ کرسکے، ہم نے صوبے میں امن و امان قائم کرنا ہے، روزگار دینا ہے،ہم بنیادی سہولیات، ایجوکیشن اور صحت میں بہتری لائیں گے، ہم ایک لاکھ سے زائد خاندانوں کی مالی معاونت کریں گے۔
علی امین نے کہا کہ چیف جسٹس سےگزارش ہے 9 مئی پر کمیشن بنائیں، ہماری خواتین اور کارکن جیلوں میں ہیں، ہمارا مطالبہ کے 9 مئی سے فائدہ حاصل کرنے والوں کا محاسبہ کیا جائے، ہم نے پاکستان کے لیے 2 حکومتیں چھوڑی ہیں اور بانی پی ٹی آئی ہمارے بچوں کی جنگ لڑ رہے ہیں۔
وزیراعلیٰ کے پی کا کہنا تھاکہ پاکستان ہمارا ہے، مرکز کی حکومت نے مینڈیٹ چوری کیا ہے،ہم پشاور میں پرامن احتجاج کریں گے، ہمیں ریزرو سیٹیں نہیں ملیں، میرے صوبے کے کچھ حقوق ہیں، ان حقوق کے لیے میں اسلام آباد آؤں گا، ہم ووٹ چوروں کے ساتھ مفاہمت نہیں کریں گے، بطور وفاقی حکومت اور صوبائی حکومت ہم آپس میں رابطے رکھیں گے،اسٹیبلشمنٹ سے مفاہمت ہوگی تو اس کا فیصلہ بانی پی ٹی آئی کریں گے۔

Staff Reporter

Rehmat Murad, holds Masters degree in Literature from University of Karachi. He is working as a journalist since 2016 covering national/international politics and crime.