لاہور (ڈیسک) لاہور ہائیکورٹ کے جسٹس شاہد کریم نے درخواست کی سماعت کے دوران ریمارکس دیے کہ اسموگ کو کنٹرول کرنے کے لیے شہری بھی اپنا لائف اسٹائل بدلیں۔
پنجاب آرٹسٹ پروڈیوسر تھیٹرز ایسوسی ایشن کی درخواست پر سماعت کے دوران عدالت نے شہر بھر کے تھیٹر رات ساڑھے 11 بجے تک کھلے رکھنے کی اجازت دے دی۔عدالت نے کہا کہ ضلعی انتظامیہ تھیٹر رات ساڑھے 9 سے ساڑھے 11 بجے تک کھلا رکھنے کا نوٹیفکیشن جاری کرے اور رات 10 بجے کے بعد کھلنے والے تھیٹرز کو جاری کیے گئے شوکاز نوٹس معطل کیے جائیں۔ جسٹس شاہد کریم نے لا افسر سے مکالمے میں کہا کہ عدالت نے کمرشل ایریاز بند کرنے کا حکم دیا تھا اور آپ نے تھیٹر بھی بند کروانے شروع کر دیے۔معزز جج نے ریمارکس دیتے ہوئے کہا کہ اسموگ کے تدارک کے لیے سب اقدامات کر رہے ہیں، بڑوں اور بچوں کا معاملہ ہے، سب کچھ شہریوں کے لیے کر رہے ہیں بعدازاں عدالت نے کیس کی مزید سماعت 30 دسمبر تک ملتوی کردی۔