لاہور (ڈیسک) فرانز لیب نے انکشاف کیا ہے کہ مردان کی ننھی اسما کے ساتھ زیادتی کرنے والے ملزم کا ڈی این اے ٹیسٹ میچ کر گیا ہے پنجاب حکومت نے کہا ہے کہ ڈی این اے اورملزم کے بارے میں  تفصیلات  کے پی کے حکومت اور پولیس کو بتائی جائیں گی

ذرائع کے مطابق مردان میں زیادتی کے بعد قتل ہونے والی ننھی اسما کا فرانزک ٹیسٹ کے دوران ڈی این اے ایک ملزم سے میچ کرگیا ہے۔ پنجاب حکومت کے مطابق خیبرپختون خوا حکومت کی جانب سے 145 افراد کا ڈی این اے سیمپل بھجوایا گیا تھا اور ان میں ایک شخص کا ڈی این اے ٹیسٹ ننھی اسما کے ڈی این اے سے میچ کرگیا ہے تاہم ڈی این اے اور ملزم کے بارے میں تفصیلات خیبرپختون خوا حکومت اور پولیس کو ہی بتائی جائیں گی

واضح رہے کہ گزشتہ ماہ مردان کے نواحی علاقے گوجر گڑھی سے چار سالہ بچی اسما گھر سے باہر کھیلتے ہوئے لاپتہ ہوگئی تھی بعد میں اس کی لاش گھر کے قریب واقع گنے کے کھیتوں سے ملی تھی اور ابتدائی رپورٹ سے معلوم ہوا کہ بچی کے جسم کے حساس اعضا پر تشدد کیا گیا،  بچی کے جسم سے حاصل کیے گئے دو نمونے پنجاب کی فرانزک لیبارٹری بھجوائے گئے تھے۔