بیجنگ (ڈیسک) چین کے ارب پتی سرمایہ کار بینکر باؤ فین کے پراسرار طور پر غائب ہونے کا انکشاف ہوا ہے۔
ان کے لاپتہ ہونے کا انکشاف انکے قائم کردہ بینک China Renaissance Holdings (سی آر ایچ) کی جانب سے ہانگ کانگ ایکسچینج میں جمع کرائی گئی دستاویزات میں کیا گیا۔ بینک کی جانب سے جاری بیان میں بتایا گیا کہ انہیں باؤ فین کی عدم دستیابی کے بارے میں کچھ علم نہیں اور گزشتہ چند دن سے ان سے رابطہ نہیں ہوسکا۔ بیان میں یہ واضح نہیں کیا گیا کہ باؤ فین کو غائب ہوئے کتنا عرصہ ہوچکا ہے تاہم میڈیا رپورٹس کے مطابق باؤ فین 2 دن سے اپنے دفتر نہیں آئے اور ان سے رابطے کی کوششیں بھی ناکام رہیں۔ رپورٹس میں بتایا گیا کہ سی آر ایچ کے صدر کونگ لین کے خلاف ستمبر 2022 سے تحقیقات کی جا رہی ہیں۔ باؤ فین کا شمار چین کی ٹیکنالوجی صنعت کے اہم ترین ڈیل میکرز میں ہوتا ہے جو متعدد بڑی کمپنیوں کے معاملات کی نگرانی کرتے ہیں۔ انہوں نے امریکی کمپنی مورگن اسٹینلے میں بینکر کے طور پر کیرئیر کا آغاز کیا تھا اور 2005 میں سی ایچ آر کی بنیاد رکھی تھی۔یاد رہے کہ اس سے قبل بھی چین میں چند بڑے سرمایہ کار پراسرار طور پر لاپتہ ہوئے اور کئی ماہ یا سال بعد دوبارہ سامنے آئے۔