کراچی (ڈیسک) آرٹس کونسل کراچی میں چار روزہ پندرہویں عالمی اردو کانفرنس کا آغاز ہوگیا۔ وزیر اعلیٰ سندھ سید مراد علی شاہ نےکانفرنس سے خطاب میں کہا کہ اردو کانفرنس کے لیے سندھ سے بہترکوئی جگہ نہیں۔عالمی اردوکانفرنس کے افتتاحی سیشن میں مہمان خصوصی وزیراعلیٰ سندھ مراد علی شاہ، پیرزادہ قاسم، سحر انصاری، امجداسلام امجد سمیت معروف ادبا، شعرا اور مصنفین نے شرکت کی۔ صدر آرٹس کونسل احمد شاہ نے بتایا کہ 13، 14 اور 15جنوری کو گوادر میں پاکستان ادب میلہ سجائیں گے۔ انہوں نے لاہور، اسلام آباد، پشاور، مظفرآباد اور گلگت بلتستان میں بھی پاکستان ادب میلہ کرنے کا اعلان کیا۔ وزیر اعلیٰ سندھ نے اردو کانفرنس میں شرکت پر ادبا، مصنفین اور شعراکا شکریہ ادا کیا۔ وزیراعلیٰ کا کہنا تھا کہ صوفیوں کی زمین اور باب الاسلام سندھ سے بہتر اردو کانفرنس کے لیے کوئی جگہ نہیں ، سندھ صوفیوں کی سرزمین ہے، یہاں سے ہمیشہ امن اور بھائی چارے کا پیغام گیا ہے۔ عالمی اردو کانفرنس میں مشاعرہ، محفل موسیقی، کتابوں کی رونمائی اور اہم موضوعات پر نشستیں رکھی گئی ہیں۔