اسلام آباد (ڈیسک) مسلم لیگ (ن) کے رہنما اور سابق وزیر خزانہ مفتاح اسماعیل کا کہنا ہے کہ اسحاق ڈار کی جانب سے آئی ایم ایف کے بغیر ملک چلانے کی کوشش سے پاکستان کو بڑا نقصان ہوا ہے۔
نجی ٹی وی پروگرام میں گفتگو کرتے ہوئے مفتاح اسماعیل کا کہنا تھا کہ ہم نے جمہوری طرز حکومت اور صدارتی سسٹم دیکھا، آمریت کو بھی دیکھ لیا، ملک میں عجیب سا ایلیٹ سسٹم قائم ہوچکا ہے جسے ہٹانا پڑے گا، ایک چھوٹی سی ایلیٹ کلاس پاکستان کے فیصلے کر رہی ہوتی ہے، ہم بھی سسٹم کو نہ بدل سکے اس لیے ہم بھی قصور وار ہیں۔ انھوں نے کہا کہ ہر ملک ہم سے آگے نکل رہا ہے جس کی وجہ گورننس کا ٹھیک نہ ہونا ہے۔ مقامی سطح پر جب تک اختیارات منتقل نہیں ہوں گے تو گورننس ٹھیک نہیں ہوگی، ہمیں نچلے طبقے کے لیے روزگار کے مواقع پیدا کرنے کی ضرورت ہے۔سابق وزیر خزانہ کا اسحاق ڈار سے متعلق سوال پر کہنا تھا کہ علم نہیں کہ ڈار صاحب کو کیوں لایا گیا لیکن ڈار صاحب نے سوچا کہ شاید وہ آئی ایم ایف کے بغیر ملک چلا سکتےہیں، انہوں نے کوشش کی جس سے پاکستان کو بڑا نقصان ہوا، حکومت اب اس بات پر راضی ہوگئی ہے کہ آئی ایم ایف کی کڑی شرائط ماننی پڑیں گی۔