اسلام آباد (ڈیسک) چیف جسٹس پاکستان عمر عطاء بندیال نے کہا ہے کہ آئینی اداروں کو بدنام کرنے والے ان آڈیو کلپس کی کوئی اہمیت نہیں ہے۔
غلام محمود ڈوگر کیس میں ریمارکس دیتے ہوئے چیف جسٹس نے کہا کہ سپریم کورٹ آئینی ادارہ ہے جسے آڈیو ٹیپس کے ذریعے بدنام کیا جا رہا ہے۔
ان کا کہنا ہے کہ ہم صبر اور درگزر سے کام لے رہے ہیں مگر آئینی ادارے کا تحفظ کریں گے۔
چیف جسٹس پاکستان نے کہا کہ افسوس سے کہنا پڑتا ہے کہ آڈیو اور ویڈیو لیکس میں ہم پر بے بنیاد اور جھوٹے الزامات لگائے جاتے ہیں۔
انہوں نے یہ بھی کہا ہے کہ ان آڈیو ویڈیو کلپس میں کیا صداقت ہے؟
چیف جسٹس کا کہنا تھا کہ ہم نے آئینی اداروں کو اپنے فیصلوں میں تحفظ دیا ہے، عدلیہ پربھی حملے ہو رہے ہیں، عدلیہ کا تحفظ کریں گے، الیکشن کمیشن آئینی ادارہ ہے جسے سپریم کورٹ تحفظ فراہم کرے گی، الیکشن کمیشن کوآئین کے تحت اختیارات حاصل ہیں جن کا مقصد شفاف انتخابات کرانا ہے، اگر شفاف انتخابات میں بدنیتی ہوگی تو سپریم کورٹ مداخلت کرے گی۔